Mia på operasjonsbordet

 Iver er gjestebloggar i dag:

MIN BAMSE  MIA MISTA ALT INNHOLDET I FOTEN.MAMMA MÅTTE SY EIN NY FOT.

Det er ikkje uvanleg at pensjonistar må på operasjonsbordet og få sett inn reservedelar. Kosehundpensjonisten Mia er i i full aktivitet, men dei mest utsette kroppsdelane har blitt litt slitte. No held dei ikkje lenger å bøte dei bitte små hola. Denne gongen måtte Mia få ny labbsåle på venstre bakfot.

Mamma fann noko mjukt stoff som likna i konsistens, men var litt mørkare. Foten vart rydda litt på innsida og fekk litt ekstra fyll før den nye sålen kom på plass med kirurgiske sting. Og så fekk pasienten kvie ut i armane til Iver.

Ugler på hendene

Lilla betyr vanlegvis at eg strikkar til Ingebjørg. Ho syklar til skulen kvar dag, så varme vottar eller hanskar må til. Desse uglevottane fann eg mønster til i nettmagasinet Twist collective. Det er eit heilt nettbasert strikkemagasin som kjem ut med jamne mellomrom og har både oppskrifter og artiklar ++. 

Eg synest dette er ein spennande måte å publisere og ta betalt for innhald på internett, så dette prosjektet har eg fulgt ei stund. Sjekk det ut her. Du finn også gamle nummer der, og alle oppskriftene ligg sjølvsagt på Ravelry. Mykje god design og veldig fine bilete. Eg har kjøpt fleire oppskrifter herifrå enn eg har strikka, men så er eg veldig glad i å lese oppskrifter...

Sommarlett og varm nok for hausten

Sommargenseren til Ingebjørg vart ferdig i tide til ferien og har vore mykje brukt. Pickles-jentene greidde å spore opp eit nøste i rett farge, så då vart den faktisk strikka etter mønsteret (Lett genser). Garnet er dobbelt tynn merino og kidsilk og vert lett, mjuk og pusete.

No når hausten er her hadde det sikkert vore kjekt med litt lenger armar, men det var jo ein sommargenser. Haustbruk er berre bonus, og så mykje som Ingebjørg har brukt denne genseren trur eg ho er nøgd.

Garnrestane vart akkurat ein liten kjole i str minste tantejente. Kanskje den passar til advent?

...og i Ravelry-butikken

Ravelry er eit internettsamfunn for dei som strikkar og heklar, og mi viktigaste kjelde til nye oppskrifter. Her er det lett å sjå korleis dei ulike mønstra vert med ulike strikkarar, og det er lett å tilpasse søket til akkurat det du har lyst å lage.

Audbjørn-lua er endeleg også på Ravelry. Eg har omsett mønsteret til engelsk og opna butikken. Norsk versjon kjem etter kvart.

Og når eg har vore gjennom mølla og blitt ein Ravelry-designar kjem det nok fleire mønster etter kvart. Mest luer, kanskje?

Inntil vidare finn du det eine mønsteret i butikken her.

Tantegleder

Gleda med å bli tante er at ein får strikke bittesmå kle - kle som berre skal passe nokre få veker. 

Gleda av å finne mønster som kan passe, garn til årstida og fine fargar. Gleda av tenke på det vesle menneske du skal få bli kjent med medan du strikkar. Gleda over å kome på at ungen treng eit kosedyr og at den kaninen sjølvsagt må ha genser.

Og ikkje minst gleda over å sjå at det faktisk passar. Det såg jo så bittelite ut at eg neste strikke eit sett til i litt større storleik.

Isolde kom ut akkurat når tante, onkel og søskenbarn skulle på ferie, så no har vi har fått helse på ho og resten av familien. Så fin, og så ny. Vi gler oss til å bli endå betre kjent med deg.

Jakka er Gift Wrap Sweater frå Carina Spencer strikka i økologisk bomull frå Pickles. Mjukt og godt til ein sommarbaby. Kaninen berre fann seg sjølv mellom pinnane.