MagFly

God idé...eller ikkje?

2012-01-08T22:55:00.001+01:00

Eg har sett mange koppeholdarar rundt omkring. Både strikka, sydde, hekla og i papir, så det var på tide å prøve sjølv. Fargen er fin og det ser pent ut, men elles er eg ikkje heilt nøgd. Halve gleda med å drikke ein varm kopp te er jo å holde rundt den varme koppen. For tida likar eg tekrus utan hank best, så dette vart litt feil. Tjukt, klumpete og litt i vegen.

Ser likevel ut som dette er ein farsott, så nokon må vel like konseptet. Dette er frå det siste Bolig pluss-bladet.

Julesmykker

2011-12-19T22:10:00.001+01:00

Både Ingebjørg og eg har ordna oss julesmykker i år.

Ingebjørg fann to små julekuler frå IKEA og gjekk til favorittgullsmeden for å få øyrekrokar på. Det vart ganske stilig spør du meg.

Sjølv har eg strikka ein ny gnom og festa på anheng og kjede. Passar heilt fint til den juleraude gensaren og favorittsjalet.

- blogga frå mobil.

Nisseri-nissera

2011-12-18T15:18:00.000+01:00

Nokre gongar gir ting seg heilt sjølv, og denne nissedusken ropte etter lue då eg fekk den i haust. Pelsdusken er i mjukt kaninskinn og assosiasjonane gjekk rett til nisselue av den amerikanske typen. Eg måtte berre finne rett garn.

Før helga kom eg over nokre nøster Faerytale som passa perfekt. Det kvite har til og med ørlite glitter i, så då vart det skikkeleg julete. I tillegg kom julesnøen i dag. Vi får sjå om den overlever dei neste dagane.

Her kjem ei enkel oppskrift dersom du vil lage di eiga julelue:

Garn: Faerytale, 1 nøste kvitt med glitter og 1 nøste raud.
Pinnar: Liten rundpinne nr 8, strømpepinnar nr 8.

Eg har brukt pelsdusk, men det går fint an å lage ein dusk av garn.

Legg opp 60 m på rundpinnen med dobbelt, kvitt garn.

Strikk 15 omg 2m r og 2m vr.Skift til raudt.
Strikk 15 omg glattstrikk.
*fell 5 m jamt fordelt på neste omg, strikk 4 omg*
Gjenta mellom stjernene til du har 5 m att på pinnane.

Trekk tråden gjennom, fest garnendane og sy på dusken.

Ha fine førjulsdagar!

Resirkulert julestemning

2011-11-12T12:08:00.001+01:00

Dagens juletips er å plukke fram nokre gamle juleblad for å få fart på førjulsstemninga.

To år gamalt, men har både juletre, snø og pepperkaker.

- blogga frå mobil.

Eida-hue

2011-11-11T21:29:00.001+01:00

Kulturnatt Nordfjord på Eid vart starta med refleksarrangement i Malakoff i kveld. Musikk, akrobatikk, refleksløype, kakao og kakemanna. Kreative Kvinner har sett saman eit utruleg flott opplegg og med mørket og tåka vart det heilt magisk for dei som hadde møtt opp. Dei som ikkje rakk kan prøve ein annan kveld. Sjølve refleksløypa kjem til å henge ei stund. Ta med deg lommelykt og gå på refleksjakt i mørket!

Det var eit godt høve til å teste ut ein ide eg har hatt lenge. Eg <3 Eid-logoen har vore i bruk ei stund og eg har tenkt at den passar fint på t.d. ei lue. No har eg laga den med refleksgarn i logoen slik at den også gjer oss litt sikrare i trafikken. Her er mønster for dei som vil lage si eiga Eida-hue.

Eg <3 Eid-lue

Garn: 1-2 nøster svart garn med strikkefastheit ca 16 m per 10 cm på pinne nr 4,5-5. Ein rest kvittgarn til broderi. Her er det brukt Dale Hegre.
Pinnar: Rundpinne nr 4,5 og nr 5.
Storleik: Barn (Voksen)

Dersom du vil ha reflekslue må du ha refleksgarn frå Seeme.

Legg opp 80 (92) m på pinne nr 4,5. Strikk brot med 2 rette og 2 vrange masker i 10 (12) omg eller ca 5 cm. Strikk glattstrikk til lua måler i 21 (24) cm.

Vreng lua, del maskene på to ulike pinnar og mask sammen slik du ville gjort på skuldra av ein genser. T.d. sy sammen, strikk saman ei maske frå frå kva pinne medan du feller eller fell fyrst og sy saman etterpå. Det siste ligg det ein instruksjonsvideo til her.

No skal lua sjå firkanta ut.

Broder "Eg <3 Eid" på lua etter diagrammet under. Dersom du vil ha reflekseffekt på skrifta må du fyrst brodere i kvitt også brodere med dobbelt refleksgarn over maskene etterpå.

Du kan syy ein frynsedusk i kvart luehjørne. Sy gjennom hjørnet med dobbelt tråd ca 6-7 gongar og knyt godt rundt. Det er viktig at dusken ikkje vert for tung. Då står ikkje frynsene oppover. Om du vil kan du blande reflesgarn i dusken òg.

Broderiet kan sikkert brukast til andre ting og i andre fargar òg. Bruk fantasien!

Dette biletet viser reflekseffekten. Det var ikkje så lett å ta skikkelege bilete av ei svart lue med refleks i kveld, men vi får sjå om vi får tatt nokre betre bilete i morgon.

Strikkedebutant

2011-11-03T20:44:00.001+01:00

Iver har knekt strikkekoden, så denne sløyfa har vi samarbeidd om. Han har strikka nesten annakvar pinne sjølv, og på ei lita strikkestund vart det sløyfe. Vi har litt arbeid med å feste trådar og nål på, men den blir omtrent sånn.

- blogga på farten.

Gratulerer med dagen, Olivia!

2011-11-01T18:17:00.000+01:00

Små nieser er ei god unskuldning til å strikke noko morosamt. Iver og eg fann denne jakka og garnet i sommar, og var heilt sikker på at den skulle Olivia få. I dag vart Olivia 2 år, så då passa det godt å få pakke i posten. Vi lagde ein liten hund som også fekk vere med å gjere den mjuke pakken litt artigare.Det har vore diskutert i familien kva denne typen hund eigentleg heiter: pølsehund, kommodehund, ovnsrør...og andre kreative framlegg. Eg kunne ikkje hugse at det eigentleg er ein dachs før etter ganske lang tid. No har dei i alle fall kome fram til Oslo og får heilt sikkert eit triveleg liv der.

Ravelry-prosjekt og oppskrift.

Ha ein skummelt fin dag

2011-10-31T08:38:00.002+01:00

Litt halloween-moro må vi ha her på bloggen. Desse glasa ser veldig magiske ut og passar andre dagar enn 31. oktober òg. Trikset er å klippe over ein glødepinne (av den typen du knekk, også lyser den av seg sjølv ei stund) og riste innhaldet over i eit glas. Det sprutar litt, så vær ute eller pass på. I går regna det, så vi fann ut at effekten vert dårlegare dersom glødeveska blandar seg med vatn.

Eg fann bruksanvisninga her.

I går hadde vi skummelfest på Holmen. Det hadde regna mykje på førehand, men det gav seg heldigvis i akkurat tide. Som vanleg mykje folk, skummel mat, bål og spøkelser. Dette har blitt ein fin tradisjon, som ungane gler seg til gjennom heile året. Glimt frå tidlegare år her og her.

Mannen med ljåen var også med, men tok heldigvis ikkje nokon med seg. Dei fleste hadde kledd seg ur, så holmen var full av hekser, spøkelser, vampyrar og andre skumle skapningar. Ikkje så mange riddarar og StarWars-menn i år.

Tilslutt viser eg bilete av denne vesle heksa frå 2004. Ho brukte same kostyme i år, og har meldt frå til mammaen om at no er det for lite. Eg trur eg skal ta hintet. Heldigvis 1 år til neste gong...eller tenkte ho på nyttårsafta?

"Mamma, du må lage ei bursdagsgåve..."

2011-10-25T22:13:00.003+02:00

Av og til angrar eg litt på at ungane mine trur at eg kan trylle fram kva som helst på null tid, men det er jo kjekt at dei aller helst vil gje bort heimelaga gåver til venene sine. Denne gongen vart det eitt pennal og ein sminkepung. Modellen fekk dei ikkje velge, men dekor og fargar skal nok passe til mottakarane.

Og for ordens skuld. Dette tek litt meir enn null tid...

Og mamma innrømmer glatt at det er kjekt å få sy litt, og no når maskina likevel er framme får eg kanskje testa nokre fleire idear?

Si hei, ver en ven!

2011-10-25T08:15:00.000+02:00

Det er BlimE-veke hos NRK Super denn veka, og Iver har laga sitt heilt eige BlimE-band. Han har det fordi han vil vere ein god ven. Han meiner at når ein skal vere ein god ven må ein vere ærleg, snill og ikkje snakke stygt, og det er mamma heilt einig i.

Dersom du vil lage ditt eige BlimE-band og sende inn bilete til NRK Super. Iver sitt er fletta av tre ulike garntypar. Han har fletta inn eit hjerte fordi det viser at du er ein ven.

Dene veka passar det dessutan godt å sjå den heilt ferske tvserien Vaffelhjerte. Du finn episodane i nettv og litt av den fine musikken til Odd Nordstoga finn du her.

Ha ein fin dag og Si hei, vær ein ven!

Valkyss

2011-09-11T22:07:00.000+02:00

I morgon er valdagen her, og i år er det litt spesielt her i heimen. Alfred står på valg, og må nok rekne med å kome inn i kommunestyret. Eg kunne ha sagt mykje om at alle bør stemme på han og slikt, men det greier han heilt fint sjølv.

Mitt valkampbidrag har vore å lære ordførarkandidaten å bake marengs. Ser veldig imponerande ut, men det einaste du treng er eggekvite, sukker og tolmod. Oppskrifta ligg her.

Uansett kor mykje marengs, muffins, roser og valflesk politikarane sleng kring seg før valdagen er det ikkje det som tel. Det som tel er det engasjementet alle desse politikarane legg ned fordi dei bryr seg om det samfunnet vi lever i. Det er ingen av dei som ventar å få betalt i kroner og ører for alle dei timane dei legg ned, men dei har alle eit brennande ønskje om å gjere ein skilnad og gjere ting betre for oss andre.

Politikk handlar ikkje berre om å krangle, kutte, kreve eller klage. I alle kommunar og alle lokalsamfunn handlar politikk om å bli einige om dei beste løysingane. Og ofte handlar det om prioritering, og dei prioriteringane kan vere svært vanskelege når ressursane ikkje er like store som ønskjelista. Politikarane arbeider med sakene i fleire ledd, diskuterer og tenkjer før demokratiet let fleirtalet bestemme. Eit kommunestyre har mange medlemar, skal spegle kommunen dei bur i, og er like viktige alle saman. Sjølv om nokre tilhøyrer store og andre små parti, er dei ein del av den politiske prosessen.

Eg er imponert og takksam over dei som gjer denne jobben for oss andre i årevis. Iver Nordseth på Smøla har t.d. vore ordførar i 20 år før han gir seg i morgon, det står det respekt av. Og i heimkommunen min Vågsøy trur eg dei kjem til å sakne Geir Oldeide på kommunestyremøte, trass alt!

Landet er fullt av flinke folk på val i morgon, men det er ikkje plass til alle. I kveld skal eg ta meg tid til å kike på alle listene i kommunen. Alle dei som står der skal ha honnør for å ønskjer å vere med å gjere ein skilnad. Kommunen er ikkje større enn at eg vil vite kven dei er. Eg veit også at eit par namn frå andre lister vert med over på mi liste i morgon. Det er folk eg har tru på og tillit til, og gjerne vil skal få vere med å styre kommunen vår.

God val (og heia Alfred)!

Oslo 2. september 2011

2011-09-04T20:57:00.001+02:00

Både Ingebjørg og eg har vore i Oslo i helga. Ho på veninnebesøk og eg på kurs.

Fredag hadde vi nokre timar i lag, så då måtte vi bruke litt tid rundt Regjeringskvartalet. Det er berre fem minutt frå der vi bodde i for nokre år sidan, så det er våre gater og vår del av byen. Det var i desse gatene vi gjekk til og frå biblioteket, t-banen og jobb.

Vi fekk sjå at det framleis er våre gater som ligg der, sjølv om det er stengt og sprengt i Grubbegata. Ingebjørg kjente seg att og brukte kameraet flitting. Mange vindauge er knust og stengt, og nokre ser vi at er heilt nye, så kontrastane er store.

Byen lever vidare med eit stort sår, men det var godt å sjå at kvardagen rundt er på veg tilbake. Det vert aldri heilt som før men vi kjenner det att.

Biletet har Ingebjørg tatt av klokka på Møllergata 19.

Resirkulert

2011-09-01T21:36:00.000+02:00

I dag måtte Ingebjørg og eg berre prøve å lage kartong-lommebok. Ho skal jo til Oslo i morgon, og då er det kjekt å ha med noko og ha pengane i.Vi hadde nesten rette knappen, så det gjekk fint.Lommeboka er sjølvsagt inspirert av Ingrid Riddervoll, og oppskrifta fann vi her. Vi skal nok prøve oss på litt fleire seinare, men no har vi akkurat levert papirboss så det var nesten tomt for kartongar. Denne er appelsjinjus frå Lerum (sjølvsagt på nynorsk).

Fleire luer med dusk

2011-08-31T23:01:00.002+02:00

Duskluene vart populære, så no har Iver fått han òg. Lua er sjølvsagt grøn og med mjuk svart dusk. I dag var det heldigvis for varmt for lue, men i år er eg redd for at hausten kjem fort.

Garnet er Abuelita tjukk og tynn og veldig godt og mjukt.

Middag under eit tre

2011-08-24T18:12:00.001+02:00

Det regna litt, men det gjorde ingenting. Iver og eg var åleine heime, så vi ville ete middagen vår ute i dag, Turen vart litt kortare enn planlagt, for vi måtte finn eit tre å sitte under. Der åt vi wraps med ost, skinke og salat og kika på regnet. Regndråpane lagde fine ringar i vatnet.

Hausten kan berre kome

2011-08-23T08:58:00.001+02:00

Når det ikkje kan vere sommarveir kan hausten like godt kome. Duskelua til Ingebjørg er i alle fall klar.

Haust beyr at eg med godt samvet kan strikke nye huer, kle på meg ullgenser utan at folk ser rart på meg, krype under ullteppet, fyre i omnen go gå ute i kald, klar haustluft. Kanskje eg til og med kan sy ein ny ullkjole.

Duskelua er i Pickles garn (Abuelita tjukk og tynn). Mjukt og godt å strikke med, men loar litt sidan det er laust spunne. Eg skal legge ut oppskrift dersom det vert interesse for det...også må eg skaffe fleire duskar. Det er fleire som ønskjer seg duskelue.

- blogga på farten.

Lilla feiring og for lita lilla lue

2011-08-21T23:18:00.001+02:00

"2011, ja det var det året mamma hadde fått tak i lilla konditorfarge til bursdagen min!" Viss ikkje det vert lillabursdag dei neste ti åra òg. Det er ganske mykje att i boksen.

Eg skulle altså overraske Ingebjørg med lilla glasur på muffinsen til bursdagen hennar, også tok det litt av... Lilla glasur, lilla marsipankake og ikkje minst lilla rullekake - både inni og utanpå.Veldig gøy! Det smakte godt, men eg må innrømme at det ser ganske feil ut. Burdagsbarnet var heldigvis godt nøgd med feiringa - og lillafargen!

Det som ikkje var like vellukka var den lilla gåva. Haustlue med fuskepelsdusk, men den vart for lita. Sånn går det når mamma finn opp oppskrifta undervegs. Heldigvis har vi eit litt mindre søskenbarn som skal få ny lue i staden, og på rundpinnen er det allereie ei halv lue i str 11 år.

Denne lua var kjekk å strikke, så den kjem det oppskrift på etter kvart dersom nokon vil ha.

Vi har planta avokadostein

2011-08-17T08:12:00.001+02:00

Over frukost kom diskusjonen om det går an å plante avokadosteinen opp att. Vi konsulterte sjølvaste internettet og fann ut at dette er måten å gjere det.

Vask steinen og heng den halvvegs ned i vatn ved hjelp av tre tannpirkarar.

Vi trur den heng rett veg, men det vil vise seg. Vatnet skal skiftast annakvar dag.

Rapport følgjer.

- blogga på farten.

Ekte ull og falsk pels

2011-08-16T18:39:00.001+02:00

Det kom eit par pakkar i posten i dag. Mjuk merinoull frå Pickles og eit par fuskepelsduskar.

Eg har minst ein plan eller to med desse. Ein av dei bør vere klar til bursdag på fredag, så det er berre å legge opp.

- blogga på farten.

Vott som ventar

2011-08-12T21:21:00.001+02:00

At nokon har mista ein så fin vott gjer vondt langt inn i strikkehjertet mitt. Heldigvis har ei venleg sjel funne den og hengt den lett synleg på næraste port. Eg har sjølv fått att vottar på denne måten.

Og kvar gong nokon kjem forbi tenkjer dei at det er synd på dei som har mista den gode varme votten sin, men den er lett og sjå så kanskje nokon kjenner den att snart.Det ser likevel ut for at akkurat denne votten kjem til å bli verande åleine.

Vi hadde ein fin ettermiddagstur på Skårhaug-setra i kveld med middag, muffins og utsikt før vi gjekk nedatt.

Også fann vi kantarellbarn. Dei fekk stå i fred.

Strikkekrise!

2011-08-10T12:49:00.001+02:00

Ein kjapp tur til Oslo, med fleire møter og litt dautid, krev planlegging av veskeinnhaldet. Datamaskin, dei rette papira, kablar, lommebok og ikkje minst strikketøy.

Denne gongen ser det ut for at eg har tabba meg ut. Eg skulle strikka 12 cm hals, men før flytoget kom fram til Oslo S var det minst 10 cm. Kva gjer eg no? Sparar resten til flyet heim? Strikkar noko anna frå andre enden av nøstet? Kjøper nytt?

Halsen er starten på ein rundstrikka ullkjole til Ingebjørg. Garn og pinnar til mønster i tre fargar var for mykje i veska i dag, så svaret gir seg vel sjølv.

- blogga på farten.

Rosevottar - godt for sjela

2011-08-06T20:50:00.002+02:00

Det har vore stilt på bloggen ei stund, og eg har eigentleg kjent meg litt stille innvendig sidan 22. juli.

Sjølv om eg ikkje er direkte råka av hendingane i Oslo og på Utøya traff han litt av meg òg. I Oslo var det litt av mine gater, dei eg gjekk i kvar dag då vi budde der, som vart sprengt, og på Utøya råka han noko av de viktigaste eg veit. Ungdom som engasjerer seg, lærer å delta i samfunnet vårt, blir kjent med andre og har det kjekt med noko dei brenn for. Mange har hatt det verre dei siste vekene, og eg er litt overraska over kor djupt det stakk hos meg òg.

Når det er litt stilt på innsida passar det godt å strikke kvite vottar. Rosene var sjølvsagte.

Vottane skulle berre vere med på fjelltur for å bli fotografert i flotte omgjevnader. Det var likevel godt å ha dei når det bles og regna på toppen. Sola kika ut mellom skyene fram akkurat dei minutta etter at vi kom på toppen og kameraet var framme.

Voff, voff 2

2011-06-01T08:15:00.000+02:00

Sist eg sydde hund var eg så fornøgd at eg ikkje har tort å prøve på nytt...før no. Det gjekk sånn passe bra, så no har eg ein ide om korleis eg skal forbetre modellen, og kanskje utvide til fleire artar.

Augene er sikkereheitsauge bestilt på Etsy og fungerer godt i både sydde, strikka og hekla kosedyr.

Her her han i lag med stoebroren frå 2006. Han har vore med på mykje og kan sikkert fortelje litt av kvart om kosedyrlivet på rommet til Iver.

Nissen på lasset

2011-05-30T23:17:00.001+02:00

Dei som har fulgt med her ei stund veit at eg likar å strikke bittesmå ting, og Mochimochi Land er ein av stadane eg sveipar innom på nettet når eg treng litt inspirasjon og glede i kvardagen. I går hadde Anna lagt ut eit lite tips eg ikkje kunne oversjå: Strikka gnom-ring. Utruleg søt og veldig enkel å få til.

Etter å ha brukt den på jobb ein heil dag er erfaringa at nissen sit heilt i ro på fingeren og kikar på at eg jobbar.

Gnom-nissen passa spesielt godt til den nye kjolen min. Mjuk og god sommarkjole å svinse rundt i og late som at det er varmare enn det er. Denne gongen prøvde eg eit nytt mønster, og kjolen vart alt for vid oppe på fyrste forsøk. Etter ombygginga passar den sånn omtrent og er ein ny favoritt. Det er utruleg kjekt med overlock-maskin sånn at eg kan sy i mjuke stretch-stoff.

Sjølv Harry Potter brukar støvlar

2011-05-29T21:06:00.001+02:00

Det handlar i stor grad om Harry Potter for Iver om dagen. Dersom han ikkje leikar, les bøkene eller ser film tenkjer han på trollmannsverda. Det er mykje å lure på når ein ikkje har kome lenger enn til bok tre. Mykje meir enn det mamma og pappa kan svare på sjølv om dei har lese alle bøkene. Heldigvis har vi Harry Potter-wiki. Han kan t.d lure på: "Viss professor McSnurp får barn mens hun er ein animagus? Blir det kattungar då?"

Nei, sei det...

Det er heldigvis fleire som deler Harry-interessa, så i dag har eg sydd kapper til nabogutane òg. Dei måtte prøvast både ute og inne. Eg synest det er litt morosamt at det fyrste dei to som overnatta hos oss gjorde i dag tidleg var å be om hjelp til å knyte slipset.

Kappene er klipt i svart fleece og sydd saman etter mal frå ein hettegenser. Griffing-merka er faktisk bestilt heilt frå Harry Potter-verda i Orlando, og Iver måtte ofre vekeløna nokre veker for å få det. Han har også fått seg Griffing-veske og ein slags Hedvig. Stor stas!

Hedvig er ikkje heilt vellukka i mine auge, men gutane eg godt nøgde og ho har allereie levert mykje post.

Vår i beina

2011-05-22T22:04:00.000+02:00

Det var opphold mellom regnbygene i dag, og heile familien fekk seg ein sykkeltur på begge sider av elva.

Det er ekstra kjekt å vere sju år, ha vår i beina og sykle fremst gjennom bestefar sin skog.

Ha ei fin veke alle samen!

Kakeblogger?

2011-05-20T22:19:00.000+02:00

Ingen planar om utstrakt kakeblogging, men akkurat denne var eg godt nøgd med - og ikkje minst fekk eg ein ide det er verdt å dele.

Kaka i seg sjølv er ikkje hokus pokus. Mørk amerikansk sjokoladekake, fluffy sjokoladesmørkrem (smør, melis, eggeplomme og sjokolade), kjøkenmaskin og sprøytepose.

Den morosame ideen er mini-roseoppsatsen. Eg tok ein liten telysestake i glas, vaska den og fylte den med oasis og roser. For å få plass til rosene på kaka grov eg ut litt kake med ei skei og trukte telysestaken oppi. Det ser mykje meir imponerand ut enn det er, og det er litt artig å levere kake med ekte roser til ein konfirmasjon.

Gratulerer med dagen før dagen!

2011-05-16T23:00:00.001+02:00

17. mai-innlegget er klart, så kan eg i alle fall late som at vi har kontroll i heimen.

To uniformer, ein heil bunad, ein halv bunad og ein dress i reserve skal nok pynte oss bra på grunnlovsdagen.

Den halve bunaden er vesten til Iver, som held i år òg. Det er ganske inponerande sidan han fekk den då vi gifta oss for fem år sidan. Då var han 2 og eit halvt år. Han får svart dressbukse til og var godt nøgd med det.

No skal vi berre fikse resten, også vert det 17. mai uansett. Ha ein strålande dag alle saman!

Trollmann i familien

2011-05-09T22:08:00.000+02:00

Sidan eg har ein son som lever omtrent halve livet i trollmannsverda måtte eg berre stille opp og ordne garderoben. Eg har ikkje tilgang til Diagonallmenningen, så vi måtte greie oss med det vi hadde i heimen.

Svart bukse
Kvit skjorte
Burgunder slips (skulle hatt gule striper, men godtatt under tvil)
Grå v-genser (skulle også hatt striper i Griffing-fargar...)
Pappa sitt Harry Potter-skjerf
Ny kappe sydd av nokre meter svart fleece
Tryllestav som er spikka av nøye utvald pinne og lakka svart.
Ein sopelime som låg att frå Haloween

Det vart ganske bra. Nokon som har eit par briller liggande?

Eg trur til og med eg kan få han med meg til frisøren om eg lokkar med Harry Potter-sveis.

"Det blir vel for mye å farge håret mitt svart, mamma?"

Hels på Basse

2011-04-23T20:33:00.001+02:00

Basse var eigentleg ein 2-3 år gamal UFO, men fekk vere med på påskeferie. Der kom armar og bein på plass og etter nokre forsøk fann eg eit hyggeleg ansikt òg. Bamsen er hekla i økologisk ull frå Marks & Kattens. Eit garn i fine fargar og god hold, så det passar godt til å hekle figurar med.

Den finaste niesa var også på påskeferie, så bamsen lurte veldig på om ho ville bli ven med han. Det ville ho, og tur i lag med Basse og ein stor og trygg fetter var kjempekjekt.

Ikkje ølhund

2011-04-23T20:18:00.001+02:00

...men vinhøne.

Vinhøner finst i mange variantar, så eg kika litt rundt og fann opp min eigen variant. Den ser ganske sprengt ut når den har ein heil treliter i magen, men det problemet løyser seg etter kvart.

Denne høna var ei bursdagsgåve til pappa og har flytta til ein god heim. Nokon har ymta frampå om at vi treng ei høne her i huset òg, så vi får sjå om det dukkar opp fleire.

Innpakka sjal

2011-04-22T10:40:00.000+02:00

Nøstebarnbloggen har "Kva og korleis gjer vi gåver?" som tema i april. Sjølv har eg ofte nokre glidlåspungar liggande i reserve. Dei er enkle og fine gåver både med og utan innhald.

Denne gongen trong eg noko å putte det nye sjalet mamma skulle få i. Sjalet er etter eiga oppskrift og strikka i Kid silk haze. Det skulle eigentleg vere litt større, og eg var sikker på at eg hadde to nøste i den fargen. Der eg trudde det låg fann eg berre eit rosalilla. Det vart ikkje heilt det same å halde fram i den fargen, så det var berre å felle av. (No har eg rydda, og fann sjølvsagt det andre nøstet ein heilt annan stad...)

Det vart likevel eit florlett sjal til mammaen min, og i pungen kan ho ha det lett tilgjengeleg i veska. Knappen på pungen er ein av dei eg vann i Hilde sitt blogglotteri. Hilde er ein av dei bloggarane eg har fulgt lengst, og som stadig gir meg meir inspirasjon. Ta litt tid og sjekk ut kva ho har gjort med eit gamalt dukkehus.

Eggemagi

2011-04-18T10:37:00.000+02:00

Trur det vert ein del egg i påska. Mannen min har planar om å lage ein ny type egg kvar dag heile påska. Godt vi har tilgang på høner.

I går var det gule egg, dagen før var dei posjerte og i dag hjerteforma. Spent å morgondagen :-)

Vi vart inspirert av Briggs lekehus og derifrå fann vi oppskrifta her. Det er enklare enn det ser ut, så det er berre å imponere til påskefrukosten.

Til meir tradisjonelle egg har vi nye ullkyllingar. Ha ein fin måndag!

Påskeløper på eit blunk

2011-04-16T09:37:00.001+02:00

Førre helg kom eg over desse fantastiske kyllingane på ein av dei lokale stoffbutikkane (Lappestua - for dei som lurer). Stoffbiten vart med ut til mamma og pappa, og vips såg mamma at det vart ein flott påskeløpar. Tilfeldigvis hadde ho den nye symaskina ståande på kjøkenet, så då var det fort gjort. Stoffet fekk ei bakside av eit gamalt gardinstoff og vart påskete og fin.

Eg rakk med andre ord ikkje å legge planar for desse kyllingane før dei vart borte, så eg må ned i gata og skaffe meg nokre nye i dag. Kanskje det vert slike posar som Strikkemor(o) har laga?

Påskefamilie på tur

2011-04-15T21:47:00.000+02:00

Emmeline lova tidlegare i år å pynte Førkveld-studioet til påske. Då ho tok innover seg kva ho hadde gjort inviterte ho Bloglandia til å hjelpe seg, og vi ville hjelpe.

Ho har fått tilsendt kassevis med pynt. Noko av det kan du på bloggen hennar her og her. Om du ikkje har gjort heimen påskeklar er det berre å la ser inspirere.

Mitt bidrag var dei tjukke påskekyllingane. Eg har laga dei i både strikka og hekla versjon og sendte av gårde. Dei kom trygt fram både til Emmeline og Førkveld. I tillegg har dei spreidd påskeglede i BT i dag.

Eg har laga nok kyllingar for i år, men i løpet av helga kjem nok tjukkasane frå i fjor fram att.

God påske!

Utvida maskinpark

2011-04-08T23:02:00.001+02:00

Overlock-maskin har stått høgt på ynskjelista i lang tid, og i dag kom den i posten. nytt verktøy er utruleg kjekt, så eg måtte bruke litt tid på å sjå om dette var så kjekt som eg hadde trudd. Ei overlock-maskin syr profesjonelle saunar, skjærer pent og zikkar over kanten i ein slen. Det er mellom anna mykje lettare å sy i stoff med litt stretch. Sånn som fløyel, fleece og t-skjortestoff.

Også går det MYKJE fortare.

Fyrste prosjekt var fleecegenser til Iver, og no fekk eg endeleg brukt pingvinstoffet eg har hatt liggande sidan mars 2006. Fleece er lett å sy i, det vert stort sett bra resultat. Iver var storfornøgd med genseren. Eg fekk testa dei enklaste funksjonane på maskia, og rakk å slite tråden nokre gonger.

Ingebjørg fekk seg ein kjole i løpet av kvelden. Her lagde eg mønsteret sjølv, så det er mogeleg at den må justerast litt etter kvart. No er det berre ein bitte liten pingvinstoffbit att. Eg får sove på det, så kanskje nye maskina får køyrt seg litt i morgon òg. Då skal eg dessutan trekke bokutloddninga mi.

God helg!

Den søtaste versjonen av Till there was you

2011-03-30T17:44:00.001+02:00

...og eg har bestilt fleire arugurumi-auge. Gler meg!

Praktiske greier

2011-03-27T22:03:00.000+02:00

Glidlåspungar får eg aldri nok av, og dei kan lagast i både enkle og litt meir avanserte utgåver. Denne gongen trong eg noko til å passe på leidninga og musa til datamaskina.

Elles har eg eit lite vårtips. Jodie frå Ric-Rac har delt oppskrift på utruleg søte fuglar. Det er berre å ta fram symaskina og sy litt vår sidan den har gøymt seg så grundig under all snøen.

Heilt hekla

2011-03-24T22:17:00.000+01:00

Heilt sånn i smug har eg omsett ei heklebok til norsk. Og i dag kom ein kjempebunke bøker frå Samlaget. Dei er nok på full fart ut i butikkane òg, eller kan du få tak i den her. Det er den svenske designaren Erica Laurell som har skrive den og det kjem nok meir frå den kanten. Fargerikt og enkelt i forma. Litt retro og litt leikent. Les meir på bloggen hennar.

Det er litt rart å sjå Heilt hekla når eg har lese den svenske teksten i Väldig virkat så mnge gongar. Mi omsetting har jo berre vore ei fil på datamaskina, og no er den ei fiks ferdig bok. Uvant med norsk tekst, men eg kan venne meg til det.

Boka inneheld like mykje inspirasjon som oppskrifter. Du finn både interiøridear, kle, leikar og smykke, og dei du ikkje har lyst å hekle sjølv gir deg kanskje inspirasjon til noko heilt anna. Bakerst i boka er det hekletips, og eg har i alle fall plukka opp minst eitt.

Sidan eg ikkje treng alle desse bøkene sjølv loddar eg ut tre av dei mellom alle mine faste lesarar og dei som legg att kommentarar. Kommenter på dette innlegget innan søndag 3. april, så er du med i trekkinga. Bloggfølgjarane får eit ekstra lodd.

Nye favorittkne

2011-03-20T21:01:00.001+01:00

- Kan du lage ein brun firkanta lapp og ein rund lapp, mamma?
- Du vil ikkje heller ha eit grønt monster?

Favorittbuksa hadde altfor store hol på knea, så i dag måtte symaskina fram. Dvs eg trudde eg kunne bruke symaskina, men på sånne smale gutedongribein kjem eg ikkje til med maskina. Det vart handsydde nye vener på knea. Får sjå om vi finn noko anna å bruke symaskina til.

Ikkje eit skjerf

2011-03-12T14:53:00.000+01:00

Det fyrste strikkeprosjektet kan vere eit skjerf. Enkelt og greit, fram og tilbake, rette masker. For det er faktisk slik at ein må strikke mange rette masker etter kvarandre for å lære seg å strikke. Dei fyrste maskene ser ikkje like ut, og plutseleg manglar det ei maske og ein veit ikkje heilt kva ein skal gjere med det.

Problemet med skjerf er at dei må vere ganske lange for at ein kan kalle det eit skjerf, og for ferske strikkarar er dei uendeleg lange. Dei veit jo ikkje at det går fortare etter kvart.

Ingebjørg har ikkje strikka skjerf, men pulsvarmarar. Det er det fyrste strikkeprosjektet ho har fullført og strikka sjølv. Det har tatt tid, og ho strikkar mykje fastare og raskare no enn då ho starta. Å kome gjennom dette fyrste store (!) prosjektet er ein milepel, så no trur eg ho er klar til å prøve seg på litt andre ting òg.

Pulsvarmar er eit godt fyrste prosjekt for alle som vil lære å strikke eller friske opp strikkeferdigheitene. Det står ei enkel bruksanvisning basert på Ingebjørg sine pulsvarmarar nedanfor.

Dei fyrste pulsvarmarane
(kan sjølvsagt også brukast til dei 58. pulsvarmarane)

Vi brukte Misti frå Du store alpakka og liten rundpinne nummer fem (då dett ikkje maskene av på den andre sida av pinnen...).

Legg opp ca 20-25 masker. Dersom du legg opp fleire vert pulsvarmarane lenger, men då også meir å strikke.

Strikk rette masker fram og tilbake. Hugs å telle at du har like mange masker før og etter ein pinne. Dersom du ikkje har det er det best å finne feilen før du held fram.

Når du kan legge lappen rundt handleddet kan du felle av. Ingebjørg har små hender og måtte strikke 18 riller. Sy sidesaumen, men la 2-3 cm vere ope til tommelhol.

Då kan du ta på den eine pulsvarmaren og bruke den medan du strikkar den neste. Lukke til!

Dersom strikkaren er veldig fersk kan det vere lurt å ha nokon som strikkar ein pinne i ny og ne for at det skal gå bittelitt fortare.

Emmeline treng påskehjelp

2011-03-06T17:26:00.000+01:00

Emmeline har lovt seg vekk til NRK, så no treng ho hjelp til å lage påskepynt. Les meir om prosjektet på bloggen hennar.

Eg har meldt på påskekyllingane frå i fjor, og den fyrste er allereie klar. Dersom du har lyst å lage ein strikka kylling sjølv kan du prøve oppskrifta her. Oppskrift på den hekla varianten kjem etter kvart.

Vårteikn

2011-02-28T16:18:00.003+01:00

Iver fann årets fyrste marihøne i dag. no skal det bli godt med vår. Meir på småkrypbloggen.

VM-lue - dameversjon (med VM-rapport)

2011-02-27T22:49:00.002+01:00

VM-luene har vore i bruk. Vi fekk oppleve både gull og bronse i Holmenkollen under 15 km for kvinner laurdag. Ingebjørg si lue vart klar kvelden før, så eg rakk ikkje å legge ut oppskrift, men her kjem den om fleire vil prøve seg. Damelua kan du sjå her.

Oppskrift

Str: Dame (jente).
Garn: Iglo soft frå Europris i raudt, kvitt og blått. Anna garn kan brukast og lua vert tøyeleg.
Strikkefastheit: 11 m på 10 cm med pinne 9

Legg opp 32 (28) masker i raudt. Strikk 1 omg r, med siste maske vr.

1 rille:
1. rad: Løft av 1 m, auk 1 m i neste m, strikk r til du har 3 m att, strikk 2 m saman, strikk siste m vr.
2. rad: Løft av 1 m, strikk r til du har 1 m att, strikk siste m vr.

Hald fram på denne måten og strikk 12 (10) riller raudt, 2 riller kvitt, 4 riller blått, 2 riller kvitt og 12 (10) riller raudt.

Strikk saman med oppleggsrada og fell av, eller fell av og sy saman kantane til eit rør.

Fest trådane og snurp saman på toppen. Eg lagde kvite tette duskar inspirert av VM-luer frå 1966, men det er berre å variere. Vil du ha lua meir posete legg du opp fleire masker, men strikkar like mange riller.

Vi gjekk klar t-banekaoset, men tåka kunne vi ikkje gjere noko med. Her kan du så vidt skimte Marit Bjørgen (eller er det Terese Johaug?), og det var omtrent det vi såg.

Det gjorde ikkje så mykje. Vi fekk vere med å heie, høyre speakeren, sjå på folkelivet og ikkje minst sjå fleire lure. Det var mange som hadde strikka sine eigne variantar til heile familien, så eg er ikkje så rar som ein kanskje skulle tru. De ser ein variant av den eg har på dette bilete.

Litt utpå dagen letta det litt og vi fekk med oss eit strålande gjennomført hopprenn i Midtstubakken. Der vart vi til og med intervjua av pr-avdelinga i Ski-VM. Dei hadde også funne nokre tyskarar med kuluer. Les saka her.

VM-bonus

Kosedyr må også pynte seg. Her er VM-lue for litt slitte hundar.

Str: Kosehund.
Garn: Iglo soft frå Europris i raudt, kvitt og blått.
Strikkefastheit: 11 m på 10 cm med pinne 9

Legg opp 12 masker i raudt. Strikk 1 omg r, med siste maske vr.

1 rille:
1. rad: Løft av 1 m, auk 1 m i neste m, strikk r til du har 3 m att, strikk 2 m saman, strikk siste m vr.
2. rad: Løft av 1 m, strikk r til du har 1 m att, strikk siste m vr.

Hald fram på denne måten og strikk 7 riller raudt, 1 rille kvitt, 2 riller blått, 1 rille kvitt og 7 riller raudt.

Strikk saman med oppleggsrada og fell av, eller fell av og sy saman kantane til eit rør.

Fest trådane ekstra godt, snurp saman på toppen og lag dusk.

VM-lue - no med juniorstorleik

2011-02-23T17:47:00.000+01:00

Eg er under hard regime og må strikke i alle ledige stunder for å få ferdig VM-antrekka (Iver: Du kan strikke når du har lunsj, mamma!). Dei offisielle VM-luene i svart, kvitt og gult passar seg ikkje heilt når vi skal i Holmenkollen, så det er berre å strikke i veg.

Iver si lue er allereie ferdig, så då er oppskrifta utvida med endå ein storleik. Eg har ein litt anna modell på pinnane til oss damene, så det kan bli fleire oppskrifter før VM er over. Det går sjølvsagt an strikke lua i andre fargar. Tippar gul variant vert fin til påske.

Oppskrift

Str: Herremodell, men passar godt til fruen òg (juniorutgåve).
Garn: Iglo soft frå Europris i raudt, kvitt og blått. Anna garn kan sikkert brukast òg. Lua vert tøyeleg.
Strikkefastheit: 11 m på 10 cm med pinne 9

Legg opp 45 (40) masker i raudt.
(løft av fyrste maske, strikk rette masker til du har ei maske att, 1 vr)
Strikk fram og tilbaken og gjenta parantesen etter rillemønsteret. Då lagar dei vrange maskene du løftar av fine kantmasker.

Strikk 8 (6) riller raudt, 2 riller kvitt, 4 riller blått, 2 riller kvitt og 8 (6) riller raudt.
Brett rektangelet til ein kvadrat og strikk eller sy saman langs stadene med raudt garn.

Strart i eine sida og plukk opp ca 50 (42) masker med raudt gjennom løkkene langs kanten nede. Strikk rettmasker fram og tilbake til du har 5 riller. Fell laust av og sy saman sidesaumen. Fest lause trådar.

For å lage den avrunda toppen har eg festa saman hjørnene inne i lua. Då held ho fasongen.

Lua deltek også på VM-konkurransen hos MadeinNorwayNow. Mange fine luer, og det er lov å stemme fire gongar kvar dag.

På tide med VM-lue?

2011-02-20T20:58:00.002+01:00

Sidan denne friskusen fekk VM-billettar til bursdagen måtte han ha VM-lue òg. Vi må jo vise litt att når vi skal til Holmenkollen neste helg. Denne lua er så enkel at du rekk ei hue eller to før onsdag du òg.

Oppskrift

Str: Herremodell, men passa godt til fruen òg.
Garn: Iglo soft frå Europris i raudt, kvitt og blått. Anna garn kan sikkert brukast òg. Lua vert tøyeleg.
Strikkefastheit: 11 m på 10 cm med pinne 9

Legg opp 45 masker i raudt.
(løft av fyrste maske, strikk rette masker til du har ei maske att, 1 vr)
Strikk fram og tilbaken og gjenta parantesen etter rillemønsteret. Då lagar dei vrange maskene du løftar av fine kantmasker.

Strikk 8 rillar raudt, 2 riller kvitt, 4 riller blått, 2 riller kvitt og 8 riller raudt.
Brett rektangelet til ein kvadrat og strikk eller sy saman langs stadene med raudt garn.

Strart i eine sida og plukk opp ca 50 masker med raudt gjennom løkkene langs kanten nede. Strikk rettmasker fram og tilbake til du har 5 friller. Fell laust av og sy saman sidesaumen. Fest lause trådar.

For å lage den avrunda toppen har eg festa saman hjørnene inne i lua. Då held ho fasongen.

Lueeigaren Har testa VM-lua i sporet i dag og meiner den er vellukka: Den sit godt på når ein køyrer nedvover i høg fart, er mjuk og strammar ikkje.

No er det bestilt VM-luer til heile familien, så eg oppdaterer med mønsteret på barnevariant om ikkje så lenge.

Brede

2011-02-19T22:16:00.000+01:00

Eller bokbind. I alle fall stofftrekk til ei lita bok.

Det er rart korleis idear og opplagde løysingar berre ramlar ned av og til. Eg har spekulert pã stofftrekk til notisbøker lenge, men ikkje heilt funne ein variant eg har vore nøgd med. Alle saumane må jo vere på innsida, og det har eg ikkje greidd å finne heilt ut av - før i dag.

Målt og sikta og bretta.

Snudd gjennom åpen saum på innsida av ryggen.

Eg trudde eg hadde berekna litt for god plass, men det vart akkurat.

Det vart som eg hadde tenkt, men sprikar litt no i starten. Det vart løyst med eit lite magebelte. Ikkje så praktisk, men kanskje litt pent.

Det er sjølvsagt mykje som kan bli betre, men eigentleg slik eg har sett det føre meg. Eg får prøve meg fram med ulike lukkemekanismar. Kanskje det ramlar ned fleire idear.

Gjesteblogger Iver: Sydd elefant

2011-02-13T20:19:00.000+01:00

Denne elefanten er sydd. Vi fekk mønsteret i posten. Den har litt kort snabel. Mamma lagde ein også. Det er den med blå øyre. Det tok ganske lang tid. Eg likte best å stryke.

Mønsteret er bestilt frå Heather Bailey.

Silkemagi - vottar av uspunne silkefiber (wip)

2011-02-06T10:44:00.000+01:00

Det er mykje strikkeinspirasjon å hente på andre strikkebloggar. Ein av mine definitive favorittar er Stephanie Pearl-McPhee, sjølvaste The Yarn Harlot. Tidlegare i veka viste ho fram dei nye vottane sine. Strikka av Matawa/ silk hankies/ silkelommetørkle - eg her ikkje funne noko norsk ord, men det er silkekokongar som vert dratt ut på ei ramme (25 cm x 25 cm) og tørka i stablar. Du kan sjå korleis ein gjer det her.

Eg måtte berre prøve. Berre tanken på vottar strikka av lause silkefiber var uimotståeleg. Før eg hadde tenkt meg om var 100 gram silke bestilt, og no er eg i gong. Det tek sjølvsagt lenger tid når eg må lage garnet under vegs, men eg gler meg sånn til det vert ferdig. Aller helst skulle eg hatt eit strikkedøgn sånn at eg fekk sitte i ro og fred å lage silkevottar.

Silkefibra er så lange at ein treng ikkje spinne dei til garn før ein strikkar. Eg løftar eit silke flak forsiktig opp, lagar eit hol i midten og dreg ut til "garnet" er passe jamt og tjukt. Til desse vottane vert kvart matawa til ca to meter silke å strikke med. Eg fann ei ok bruksanvisning hos Knitty for å lære denne teknikken. Som med det meste vert ein nok flinkare med litt trening.

Det vert sjølvsagt ikkje heilt jamt, men det gjer ikkje så mykje. Strukturen er litt av sjarmen. Desse vottane er i fleirfarga silke, men eg gler meg til å prøve eit par einsfarga òg. Då kjem fibrane verkeleg til sin rett.

Nei, no må eg strikke meir. Berre eit silkeflak til, og eitt til, og eitt til... Godt det er søndag.

Meir vellukka hals

2011-02-05T11:39:00.000+01:00

Eg har litt prestasjonsangst etter å ha proklamert at målet var ein KUL hals.

Uansett er dette mykje betre. Som å snurre eit tjukt sjal rundt halsen og sleppe å knyte. Godt og varmt og ein fin fargeklatt på mine elles ganske svarte antrekk.

Har du lyst å lage din eigen?

Strikk eit tjukt skjerf i så tjukt garn at det er litt hold i. Eg har brukt Hubro frå Dale på pinne 9.

Lag det så langt at det går to rundar litt laust kring halsen. Mitt er ca 90 cm.

Sy endane saman slika at skjerfet ikke er tvinna når du har snurra det to gongar rundt halsen. Dersom skjerfet er likt på begge sider er ikkje det så nøye, men på mitt skjerf ville eg ha framsida av fletta ut heile vegen.

Min hals er litt større enn det ser ut på bilete, men sånn vert det når ein må fotografere seg sjølv med kamera på strak arm.

Lukke til!

Findus-vottar?

2011-01-30T22:49:00.000+01:00

Desse vottane har eg hatt på pinnane sidan i sommar. Strikka av tynt handspunne villsaugarn, som eg har kjøpt i Kalvåg og kanta med den fine grønfargen i lammeull.

- Er du ikkje snart ferdig med Findus-vottane?, spurde Iver for ikkje så lenge sidan. Findus-vottar? eg forsto ingenting, men han har hailt klar på at det der måtte vere Findus-vottar sidan det var dei same fargane. Like etter sa mannen min det same, så då måtte eg ned og finne fram Findus.

Dei har heilt rett. Det er Findus-vottar.

Og då vart spørsmålet om dekor litt verre. Eg hadde tenkt å brodere ei lita selburose på kvar, men det går nok ikkje på Findus-vottar. Mamma må i tenkeboksen.

Findus har forresten vore med oss lenge. Han var den fyrste bamsen Iver fekk. Høgtidleg innkjøpt av Ingebjørg før han vart fødd. Etter kvart vart han litt utkonkurrert som favoritt av ein hund, men har alltid vore med og var lett å finne i dag.

Ikkje heilt vellukka

2011-01-30T22:37:00.000+01:00

Eg har sett for meg ein diger hals, sånn som alle modellane har tredd rundt halsen for tida. Flickr-inspirasjon finn du her.

Fyrst strikka eg ei flette passe langt rundt skuldrane, og ein hals vidare opp frå den. Det vart ikkje heilt som eg hadde sett for meg. God og varm, men ikkje så kul som eg har lyst på.

Så no har eg rekt opp det som er over fletta og ser om eg kan forlenge fletta og snurre den eit par gonger til rundt halsen. Vent å sjå. Det kan vere at det òg vert misslukka, men då får eg heller finne meg eit mønster.

Pakkar ned nissen

2011-01-03T00:01:00.000+01:00

Eg rakk å fullføre denne nissen før jul, men den kom seg ikkje innom bloggen. I dag pakka vi rett og slatt ned jula, så då passa eg på å ta bilete.

EG har laga fleire slike nissar, men dei er gitt vekk alle saman. Denne skulle vi ha sjølv, men den vart liggande utan skjegg i årevis. Berre sjå her.

Godt år, Nissefar! Vi sjåast i desember.

Sånne plagsomme bloggetanter utan blits

2011-01-01T15:30:00.000+01:00

Bloggetanter lagar fine luer, men når dei krever at tantebarnet stiller som modell vert det litt meir travelt. Denne tanta hadde ikkje tenkt å bruke blits heller.

"Det skjer jo noko spennande bak meg, så då kan eg ikkje så på den tullete tanta i meir enn nokre sekund."

"...og det som heng på juletreet er mykje meir interessant enn å sjå rett fram."

"Men der lurte ho meg og sa: Perfekt! Kva vart det som skjedde?"

Masetanta skrudde opp isoen, så då gjekk det fint.

Hua er frå tanta sine eigne mønster og har vore ei god barnehagehue for mange. Når superniesea skal byrje i barnehage må ho sjølvsagt ha utstyret i orden. Denne er strikka i den minste storleiken, og garnet er som vanleg Hubro.

Det gamle året vart avslutta på vanleg vis med feiring av Iver sin bursdag. Steikt is med fyrverkeri er tradisjon og her kan du sjå bursdagsbarnet frå 2009 og 2008 og 2007.

Iver vart sju år i går, og har endeleg fått seg kjæledyr. Pinnedyra Elle og Fant vart ein del av familien. Det vert spennande å bli kjent med dei. I natt åt dei mykje eføy. Eg tippar det kjem oppdatering på småkrypbloggen snart.

Godt nyttår

2011-01-01T00:18:00.001+01:00

godt nyttår
Originally uploaded by MagFly

Vi ønskjer godt nyttår med ein heilt fersk sjuåring og eit stjerneskot!

Berre 15 hus i år

2010-12-05T21:56:00.001+01:00

Eller eigentleg 17, men noko skjedde i monteringa.

Som vanleg gjennomførte vi ein ualminneleg hyggeleg førjulstradisjon. Det låg an til avlysing av pepperkakehuskaoset i år, men det vart ikkje akseptert. Så då vart det pepparkakehuspynting ei veke for seint i staden.

Ungane har vokst med åra, og i år var Frida den yngste (og kanskje mest konsentrerte) pyntaren.

Eg anar ikkje kor mange posar pynt som kjekk med, men det var ein del. Vi gler oss allereie til neste år. Takk for besøket alle sammen!

Det finaste hjertet

2010-12-02T20:12:00.001+01:00

Her i familien deler vi på julekalenderen, og alle må ordne med gåver til alle. I dag var det min tur å pakke opp gåve frå Iver. Han var omtrent sprekkeferdig av spenning. Det hadde han god grunn til, for han hadde laga det finaste hjertet til meg.

For nokre veker sidan vart Iver og pappa veldig nøgd med at mamma skulle vere borte ei stund. Iver trong nemlig hjelp til eit prosjekt. Dei starta i Lappestua sånn at Iver fekk plukka ut det stoffet han hadde sett for seg, også fann dei nål og tråd på eiga hand. Iver tekna mønster, klipte ut, sydde og fyllte vatt. Det greidde han stortsett utan så mykje hjelp, så pappa fekk tid til å ta bilete. Her kan du sjå kor fint han arbeider.

Kalendertid og oppladning i Berlin

2010-11-30T20:17:00.000+01:00

Adventskalenderen er på plass i år òg. Alle har hengt på pakkar, så no er vi klar for desember og alt det den månaden inneheld. I tillegg til jul, pepperkakehuspynting, nissefest, julebord, julespeling, julekortskriving har vi ikkje mindre enn to bursdagar i familien.

Dei eldste av oss lada opp med ein liten førjulstur til Berlin. I tillegg til restar av muren såg vi...

...gamle hus...

...nye hus...

...og julekuler.

Åt godt.

Drakk godt.

Tyskarane kan der her med jul. Dei rusla rundt på alle mogelege julemarknadar, drakk glüwein og åt smultbakst, rare pøler og kål i alle variantar. Elles slappa vi godt av og kjøpte eit par vesker.

Desemberklar

2010-11-21T15:01:00.000+01:00

Nisseproduksjon må gjerast i november elles vert det ikkje tid. Denne gongen har eg juksa litt og funne fram ein halvferdig feilproduksjon frå 2008.

Det er vel ingen som ser at denne genseren er større foran enn bak... Blåver-nissen er i alle fall fornøgd og legg nok ikkje frå seg desse kleda før ut i januar.

Pingvinveir

2010-11-08T11:08:00.000+01:00

Intensjonen om å strikke varme vottar i høge bunkar til heile familien før snøen kom holdt ikkje i år heller. Eg strikka ein heil vott i juli, men det vart med den eine.

Heldigvis har den fine mannen min handla nye vottar til meg i Tallin. Doble ullvottar med to fine pingvinar på.

Monsterstart på skumlehelga

2010-10-29T18:09:00.000+02:00

Bursdagar krever av og til at eg brått må lage noko som nokon har tenkt at eg skulle lage. Iver skal i bursdag i dag, og i Hallowen-bursdagar må ein sjølvsagt ha monsterpresang. Lue denne gongen, og vi lurer litt på storeleiken "For han er større enn meg, mamma".

Hubro og heklekrok nr. 9 brukar å gi stødige luer som tåler både veir og vind. Eg hadde eit nøste svart og eitt nøste oransj. Det passa fint til monsterhue, men eg oppdaga litt for sent at det vart ei litt kort monsterhue. Etter grundig søk etter meir garn i mange butikkar, og ha skaffa ekstraløysing fann eg heldigvis akkurat ein passe rest svart.

Monsteret har fått refleksauge, og det er eg spent på korleis det fungerer. Kanskje det vert fleire reflekshuer.

Tappenstrek-pute

2010-10-29T09:37:00.002+02:00

Alle musikantar skulle hatt ei tappestrek-pute. Her i huset har vi to kornetistar - ein stor og ein liten. Den største spelar i Eid musikklag og dei har loddsal den veka her.

Fruen måtte stille med gevinst, så då vart det Tappenstrek-pute. Tappestrek er eit militært rosignal og på Nordfjordeid avsluttar vi 17. mai med Tappenstrek gjennom gata. Eid Musikklag vart stifta som Kjøsnesmusikken allereie i 1913. Litt meir om historia til korpset finn du her.

Eg har eit nytt nøste

2010-10-23T08:16:00.000+02:00

Og ein plan.

Tjukt garn som gir tydelege grove masker, er ein trend eg har tenkt å følgje opp. Det kjem nokre enkel oppskrifter på bloggen utover dei neste vekene. Dette nøstet er 25 prosent saueull frå Gotland og 75 saueull frå andre stader. I alle fall ull.

Ein vinter til

2010-10-21T18:15:00.000+02:00

Heimestrikka sokkar strikka på pinne 2,5 går ikkje i bosset berre på grunn av eit hol. No er helen stoppa og sokkane klare for ein vintersesong til.

Vinteren kom litt brått på oss her. Akkurat no er det 15 cm snø ute, men eg er usikker på kr menge timar det varer. Uansett var det på tide å plukke fram vintergarderoben og gjere opp status. Vi treng ei regnjakke, to vinterjakker, eitt par vottar og eitt par cherroxar. Det er eigentleg ikkje så verst på ein heil familie.

Kule julekuler

2010-10-20T18:50:00.000+02:00

Eller i alle fall trendy. Det er ikkje berre eg som strikkr julekuler for tida. Den ny julekuleboka frå Arne og Carlos har inspirert fleire, og det er ikkje så rart. Det nærmar seg jul, og desse kulene passar fint som både pynt og smågåver.

Ideen er enkel nok ei grunnoppskrift og 55 variantar inspirert av tradisjonelle strikkemønster. Det tok ikkje mange maskene før eg hadde spekulert ut nokre nye julekuler på eiga hand. Den neste trur eg vert stripete. Problemet for meg er nok ikkje idear, men tid til å få strikka alle.

Det kjem ikkje til å skje. Ikkje får eg lest alle bøkene som finnst og ikkje får eg strikka alt som finnst i hovudet mitt.

Nye favorittar

2010-10-19T20:29:00.000+02:00

Planen om legge blogginnlegga klar i god tid rakna litt, så desse har vore ferdig ei stund. Faktisk så lenge at dei har blitt favorittsokkane mine.

God passform, fin farge, passeleg tjukke og ikkje minst vart begge sokkane ferdig på ein gong. Dette må eg nok prøve fleire gongar. Kanskje til og med på vottar?

Garnet er frå Blue Moon Fiber art, 100% superwash merino. Garet er godt tvunne og har godt hold, så dette sokkegarnet er slitesterkt og held seg godt i fasongen.

Merete har sett i gong med Nordiske føtter att, så dette er eitt av mine bidrag. Vil du sjå fleire finn du dei her.

Gjestebloggar med ny pute

2010-10-07T18:35:00.000+02:00

Eg har sydd pute, det var kjempemorsomt. Mamma ga meg iden om at eg kunne lage striper.
Eg trudde putetrekke var for lite men det var akkurat passeleg. Eg syns puta vart fin og har lyst å lage fleire. ;-D

Mamma har laga pute til Iver (han strøyk sjølv).
Den blei veldig fin med bilde av Barbazoo på.

(Ingebjørg plukka ut alle stoffa sjølv, strauk, bestemte rekkefølge og sydde. Glidlåsen og applikering fekk ho litt hjelp til, men det er nok ikkje lenge til ho får det til sjølv.)

Raud og varm med stjernedryss

2010-09-27T21:33:00.002+02:00

Det vart verken strikka hals eller Snella og Petronella-knappar (sjølv om eg. fann dei) på kjolen min. Halsen er rett og slett berre bretta inn og handsydd med "usynlege" sting. Det vart passe elegant og eg eleminerte farge komplikasjonen. Det hadde sikkert blitt fint med hals i kontrastfarge, men denne gongen ville eg ha heilraudt.

Det er ikkje så lett å fotograferer raudt i utgangspunktet, men denne gongen greidde Ingebjørg-fotografen det fint trass lysmangel. Kjolen har litt lengre ermar og lenger skjørt enn dei eg har sydd før. Det vert ein skikkeleg vinterkjole med varme og energi.

Orda på skjørtet henta frå boka om Tonje Glimmerdal. Eg er så samd i at fart og sjølvtillit er det som trengs, og spør du pappaen min har eg litt av begge deler. Det er eg glad for!

Stjernene er av blodstein, og eit aldri så lite kupp frå då Kathrine rydda litt i butikken.

Så no kan hausten kome, og i kveld skal eg kle meg i ullkjole og sitje på verandaen og kike på stjernene. Vi har strålande haustveir og ekstra fin nattehimmel for tida.

Raudt

2010-09-26T09:59:00.000+02:00

Eg har ein nesten ferdig ullkjole. Det er berre detaljane att: hals, skrift, knappar...

Halsen skal stikkast og her kjem det fyrste problemet. Ingen av desse fargane passar heilt. Det er ikkje heilt den rette raudnyansen, og sidan raud er ein vanskeleg fotofarge vert ikkje biletet heit rett det heller. (Kjolefargen under er rettare.)

Problem nr to er at eg har forlagt dei fine Snella og Petronella-knappane. Hmmm...ein heil pose med fine ord-knappar ligg eit i ro og seiier ingenting.

Postoverrasking og sokkeekspriment

2010-08-28T11:31:00.000+02:00

Det lage eit oppskriftshefte frå Rowan i posten då eg kom heim i går. Eg har abonnert på Rowan magazine i fleire år og kosar meg alltid lenge med dei. Det kjem to tjukke magasin kvart år fullt av inspirasjon historier og oppskrifter. Bette bileta er inspirerande sjølv om eg sjeldan strikkar noko frå desse blada. Men dette kom heilt utanom og utan forvarsel. Winter Kids inneheld 20 mønster for ungar frå 3 til 12 år.

Strikketøyet har ingenting med Rowan å gjere. Ideen om å strikke to sokkar på ein gong har sjølvsagt fascinert meg i årevis. Ein av grunnane til at eg ikkje strikkar så mykje sokkar eg jo at eg må lage to like ting rett etter kvarandre. No var alle tynne ullsokkar tynnslitne og eg hadde eit freistande Socks that rocks-nøste liggande. På tide å prøve?

Eg har kjøpt Melissa Morgan-Oakes si bok og fann ein lang rundpinne. Boka har enkle steg for steg-forklaringar, så det gjekk veldig greit. Det gjenstår sjølvsagt å sjå om eg kjem meg gjennom helane?

Haust

2010-08-23T17:51:00.002+02:00

Originally uploaded by MagFly

Det kjennest ut som om det er på tide å ønskje hausten velkomen.

Ta på langarma kle utan at folk ser rart på meg. Snuse på den friske lufa, tenne lys og strikke litt.

Denne hausten ser eg fram til nye sokkar, mykje kantarell, kald oktoberluft og nokre nye bøker. Mellom andre denne:

I nettet

2010-08-06T19:05:00.002+02:00

I nettet
Originally uploaded by MagFly

Det vart dramatisk reality-underhaldning rett utanfor glaset då vi åt middag i Briksdalen i dag.

Denne korsedderkoppen sikra seg ei diger fluge til middag. Pakka den raskt inn og sette seg godt tilrette midt i nettet. Edderkoppen hadde spunne nettet sitt rett utanfor glaset, så det var lett å følgje med.

Dei skulle berre visst kva drama dei gjekk glipp av alle turistane som kika på fossar og brear.

Jordmallows

2010-07-27T22:54:00.001+02:00

Vi feriera vidare med ein liten fjelltur til kvelds.

Ein av dessertane vart jordbær dekt med grilla marshmallows.

Feriestrikk #1

2010-07-08T14:07:00.000+02:00

I vinter tenkte eg at eg måtte hugse å strikke vottar til heile familien i sommar. Når vi akutt frys på fingrane tek eg meg ikkje tid til tynne pinnar og fin design.

Vottar er fint feriestrikk, og eg startar med vottar til meg sjølv :-). Luksusull frå Shetland og handspunne villsau-garn vert nok bra.

Lille trille

2010-07-08T13:12:00.002+02:00

Eg har rydda litt i garnet og fann denne vesle fyren. Han var nesten ferdig, men var blitt gløymt under nokre kilo alpakka i minst fire år.

Ein liten time samansying og dekor, og så var han klar for eventyr. Skal snart flytte til ein annan liten fyr, tenkjer eg.

Mønsteret er Kate av Jess Hutchison. Meir av Jess her.

Skal snart dukke ned og finne eit gamalt strikketøy til. Har du sett kva du har i garnhaugen i det siste?

Feriefleece

2010-07-06T21:15:00.000+02:00

Eg burde pakka og rydda og ordna, men sindan det snart er ferie er det tid for monstersaum igjen. Denne gongen vart det fleecegensrar til å trekke over seg på kjølige sommarkveldar. Fine og lette ferieplagg som til og med kan brukast som pute om det trengs.

Eg har ikkje sydd hettegansrar før, så eg utstyrte meg med fem meter fleece og SikkSakk-boka til May B. Langhelle og sette i gong. Ingen mønster vart fulgt heil, men dette er variasjonar over eit par. I tillegg sydde eg ein liten genser i str "Lite søskenbarn som skal vere med på ferie". Vi håper i alle fall at den passar.

Gensrane er visst varme nok til sykkelturar òg. Vi skal reise til eit flatt og fint sykkel-land, så det passar godt at Iver akkurat har lært seg å sykle.

Jonsok med frosk

2010-06-23T22:43:00.000+02:00

Det har vore stilt på bloggen lenge, men det er så mykje som skjer og lite tid til å sitje i ro. Mellom anna startar Dei nynorske festspela i morgon, så då er det berre å brette opp ermane. Midt i festspelførebuingane tok eg meg sjølvsagt tid til jonsokfeiring på Holmen.

Der møtte vi ein frosk midt i eit grønt hjertehav.

Iver hadde laga eige pølsebål, og sjølvsagt vore med å byggje det store i lag med bestefar.

17. mai(tog)kake

2010-05-16T21:03:00.001+02:00

Ungane fekk frie tøyler og ansvar for å lage kake til 17. mai. Dei samla seg raskt om brownieskake med 17. maitog før dei planla detaljane, skreiv handleliste, handla og bakte. Med ein korpsmusikant og ein fyrsteklassing (som skal bere fane) har det vore mykje snakk om 17. mai-tog dei siste dagane, så det var ikkje så rart at det vart tog på kaka òg.

Ingenting er tilfeldig, og dei som går i toget har fått tekst på baksida av fana i tilfelle dei gløymer teksten på Ja vi elsker. Legg merke til dei fine duskane og all raudrussen som spring langs toget. Denne kaka vart så fin at eg ikkje er heilt sikker på om vi kan ete den.

Grønt besøk

2010-05-16T15:50:00.001+02:00

Det har vert langt mellom oppdateringane når eg ikkje får strikka så mykje som eg vil, men sånn brukar det å vere i mai.

Vi har ikkje heilt slutta fugleforinga for i år, for gulspurvane har oppdaga at vi har solsikkefrø. Dei kjem i store flokkar i lag med grønfinkane og et så for dei greier. Vi kikar på dei frå kjøkenglaset, men det har ikkje vore lett å ta bilete. Etter at eg fekk knipsa desse to kom det eit par raudstruper og ein bokfink i tillegg.

No vel eg har vår

2010-05-01T17:54:00.000+02:00

Det er mai, så no vil eg ha litt vår snart. På kjøkenbenken var vannmelonfrøa spira fint, og snart skal vi så litt ute òg. Vannmelon er årets ekspriment. Det hadde truleg vor tryggare med tomat, men ikkje så morsomt.

Ferdige sokkar - med gjesteblogger

2010-04-26T22:34:00.001+02:00

Heile tida mens eg har strikka desse sokkane har eg gledd meg til å gje dei til Ingebjørg. Ho er akkurat som mammaen sin og får ikkje nok ull, og desse sokkane var heilt perfekt. Ho har tilfeldigvis lilla bukse som passar spesielt godt til.

Her kjem eigaren si vurdering av nye-sokkane:
Sokkane er veldig gode å ha på, men litt trangt nede i skoa. Dei varmar godt og dei er veldig fine.

Berre ein omgang til

2010-04-24T11:04:00.004+02:00

Nokon utprega sokkestrikkar har eg aldri vore, men eg kan nok bli. Ullsokkar strikka på pinne 2,5 er noko av det beste for fryspinnar som meg, men tidlegare forsøk har tatt veldig lang tid.

I eit anfall av strikkegalskap før jul ein gong meldte eg meg inn i "Rockin' sock club 2010", men mål om å bli ein flinkare sokkestrikkar på tynne pinnar. Så no får eg eksklusivt garn og oppskrifter frå Blue moon fiber arts anna kvar månad. Ingen veit kva som kjen før pakken ligg i postkassa, og berre medlemmer har tilgang til oppskrifter og garn det fyrste året. Eg er ikkje så opptatt av eksklusiviteten, men spenninga passar meg godt.

Mars-pakken inneholdt ein farge som passa Ingebjørg perfekt, og den eine oppskrifta fekk eg lyst til å starte på med ein gong. Etter mange dagar med intens trong til å strikke berre ein omgang til, har eg snart fullført eit heilt sokkepar. Spenninga i å sjå korleis mønsteret vert og korleis fargane skiftar er i ferd med å gjere meg til sokkestrikkar.

Strikketanke

2010-04-15T18:17:00.000+02:00

Stjernestrikk på Cats

2010-04-07T10:25:00.000+02:00

Dette er eigentleg ei melding til lokale lesarar. Det vert stjernestrikk-tema på Eid husfildslag sin strikkekafe på Cats i morgon.

Med utgangspunkt i Pickles si oppskrift på Stjernespekk-sjal kjem eg til å strikke og fortelje dei som har lyst å prøve korleis ein gjer dette. Ta med garn og pinnar og kom.

Som bestilt

2010-03-23T21:23:00.002+01:00

Vårlua av Pickles-garnet vart akkurat som eigaren hadde bestilt, så då må eg vel vere fornøgd. Eg har ikkje så mykje att, men det skal eg strikke litt av. Må berre lage ein prøvelapp, for fyrste forsøk vart litt stort.

Og Hilde: Ja, eg trur dette er perfekt til tjukke grytelappar. Heklekrok nr 9 passa fint.

Garnsnop

2010-03-22T20:18:00.000+01:00

Sjølv om ungane hoppar på trampolina i dag vil ikkje mamma heilt gå med på at lue-sesongen er over. Eg har nemlig snopa litt garn hos Pickles-jentene. Det øverste er økologisk bomullsgarn frå Peru. tjukt og godt, så det kan bli ei fin vårlue til Iver.

Pickles extra fine merino har så mange fine fargar at eg vert våryr berre av å sjå på dei. Eg har nokre planar der òg, men må nok teste litt fyrst. Gler meg!

Ikkje akkurat rype

2010-03-21T23:36:00.000+01:00

Eg innrømmer glatt at eg er litt einspora fortida, men no har eg snart brukt opp det gule nøstet.

ALfred ba pent om å få ein kylling i bilen (!). Ein ekte eksos-kylling...

Dobbelt-pip

2010-03-18T23:34:00.001+01:00

Her er den litt tjukke storebroren til påskekyllingen frå måndag. Denne gongen har eg laga ei strikka variant for å sjå korleis det vart. Den vart litt tjukk, men ganske påskesøt.

Mønster for deg som vil prøve sjølv:

Kropp
Finn gult garn og pinnar som er litt tynnare enn garnet er meint for.

Legg opp 8 m på fire strømpepinnar.
Str 1 omg r.
Auk 1m i kvar maske = 16m.
Str 1 omg r.
Auk 1m i kvar maske = 32m.
Str 1 omg r.
(Str 1m auk 1 m i neste m) repeter parantesen ut omgangen = 48m.
Str 15 omg r.
(Str 4m r, str 2m saman) repeter parantesen ut omgangen = 40m.
Str 5 omg r.
(Str 3m r, str 2m saman) repeter parantesen ut omgangen = 32m.
Str 4 omg r.
(Str 2m r, str 2m saman) repeter parantesen ut omgangen = 24m.
Str 3 omg r.

Fest tråden i botn av kyllingen og fyll i vatt. Viss du vil at kyllingen skal stå støtt er det lurt å pakke inn ein liten stein i vatten for å gje tyngde i botn. Fyll opp med vatt og form kyllingen før du feller. Viss du bruker auger med bakfeste festar du dei no. Dersom du ikkje har slike auge kan du sy med svart tråd til slutt.

Str 2 og 2 m saman ut omgangen = 12m.
Str 2 og 2 m saman ut omgangen = 6m.
Klipp av tråden og trekk den gjennom maskene, snurp og fest tråden.

Kammen og nebbet er hekla i raudt garn.

Kam
Hekl 5 lm, hekl 1 stav i 3. lm frå heklekroken, 1 kjm i same m.
1 stav i neste lm, 1 kjm i same m.
1 stav i neste lm, 1 kjm i same m.

Nebb
Hekl 4 lm, lag ein bue ved å hekle 1 kjm i 1. lm.
Hekl 3 lm, lag ein bue ved å hekle 1 kjm i 1. lm.

Fest kam og nebb godt og sy evt på auge.

Lukke til!

Pip pip

2010-03-15T22:30:00.000+01:00

Innimellom all snøen og alt det andre som skjer utanfor bloggen insisterte denne kyllingen på at eg måtte lage den i kveld.

Ein klassisk amigurumi-kylling helka utan oppskrift. Eg har lagt ein stein i botn for å få litt tyngde, og dei nye barnesikre kosedyraugene frå Etsy vart akkurat så søte som eg håpa.

Tantejakke

2010-02-28T13:10:00.000+01:00

...eller er det ei niese-jakke?

Eg har ikkje så lang erfaring i tante-faget, men det er vel kontakter det ute som kan lære meg opp :-) Førebels har eg tatt tanteoppgåvene såpass alvorleg at eg har komponert ein eigen Olivia-modell med marihøneknappar. Det såg litt svart ut ei stund, men det vart omtent som planlagt. No er det spennande å sjå om jakka passar.

Ups...rekna feil

2010-02-27T13:40:00.001+01:00

Eg hadde eit mjukt, halvsirkelforma sjal i tankane, og fann eit nøste som passa perfekt: Iris frå Rauma ullvare i rett grønfarge.

Enkel strikke-matematikk er kanskje noko av det er brukar mest når eg strikkar utan mønster, men denne gongen skar det seg heilt. Eg stussa litt undervegs, men stolte på reknestykket. Resultatet vart ikkje heilt slik eg hadde sett for meg, dette vart ikkje ein halvsirkel. Trur eg må ha rota litt med radius og diameter eller gjølymt å dele sirkelen på to eller nåke heilt anna

Berre å rekke opp og rekne på nytt, og når sola skin så sterkt at eg kan sitte ute å rekke opp er det nesten kjekt å rekke opp mohair òg.

Avslørt

2010-02-22T21:26:00.000+01:00

Ja, Strikkemor(o) har rett. Ho har sett lua på ein annan person tidlegare. Dvs det var eigentleg prøvelappen, og det er ikkje alt som kjem på bloggen.

Eg tok utgangspunkt i den forrige prøvelappen då eg planla vindmøllehua, men gløymte at lua vil oppføre seg heilt anleis når ein strikkar med to (og tre) fargar på ein gong. Difor vart den fyrste lua alt for lita, eller eigentleg heilt perfekt til Ingebjørg.

...og duBedåre, her kan du lese litt meir om vindmøller.

Strikketanke

2010-02-21T16:18:00.003+01:00

Dette kan aldri bli fint. Det ser heilt kaostisk ut.

To be continued.

No treng du ikkje fryse på øyrene

2010-02-20T18:18:00.001+01:00

Mannen min har venta veldig lenge på denne hua. Han har frose på øyene i heile vinter, og eg har lova og lova. No er hua endeleg ferdig og den er testa på skitur i sol og 6-7 minus. Han har gitt den terningkast fem, så der er nokre forbetringspunkt til neste gong.

...og ja, det er vindmøller denne gongen òg.

Skjørtefabrikk

2010-02-07T21:37:00.002+01:00

Det vart skjørtesøndag denne veka òg, men no meir av samlaband-typen. Ingebjørg og ei par veninner konstruerte skjørtemønster og teikna, men sidan stoffvalet var velur måtte mamma gjere det meste symaskinarbeidet.

Vi fekk til ein enkel modell med strikk i livet. At det er meir stas med sjølvsydde kle enn dei kjøpte er kjekt, men billegare er det ikkje. Heldigvis er det frameleis litt stoff i lageret, men på denne måtet varer det ikkje lenge. Eg får dessutan meir og meir lyst på overlock-maskin, men det er ikkje heilt gratis det heller.

Heilt eige skjørt

2010-02-01T19:48:00.000+01:00

Ingebjørg har sett lengselsfullt på symaskina i fleire år, men så lenge beina ikkje når ned til pedalen er det ikkje mykje vits. No er beina lange nok, i helga utvida ho garderoben med nytt skjørt.

Det måtte litt mammahjelp til, men ho teikna av og klipte ut mønster, teikna over på stoff, klipte ut stoff (og gløymte saummonn, men mamma trylla litt), festa saman med nåler, sydde i lag med mamma og strauk ned saumane. Neste steg er å sy noko heilt åleine. Nokon som har eit tips om nybyrjar-prosjekt?

Skjørtet er sydd i brun ullboucle. Mamma har sydd kjole i samme stoff, men den er ikkje heilt ferdig. Kanskje i kveld?

Heller litt tidleg ute

2010-01-25T21:03:00.000+01:00

Enn å tru at eg strikkar nissar i desember. Dvs eg strikkar litt på dei, men det vert ikkje tid til å gjere nokon av dei ferdig.

Eg fekk eit anfall av strikkeapati på grunn av ca 15 påbegynte eller påtenkte planar. Medisinen er alltid å rydde i strikkekorga, og der fann eg denne karen. Han trong berre å opne augene, så var han klar. Han har stål (eller piperensarar) i bein og armer, og kan sikkert ta i eit tak mens han ventar på juletria.

Elles kan vi melde om at "Iver samlar in"-aksjonen er avslutta i dag, og i morgon vert 1111,50 kroner sett inn på kontoen til Redd Barna. Hurra for Iver og alle andre som gjer det dei kan for folket på Haiti.

Iver samlar inn

2010-01-21T21:19:00.000+01:00

Fyrst og fremst tusen takk for alle kommentarar og gode tankar etter farmor-innlegget mitt. Det er godt å skrive litt og rydde tankane litt i slike tider.

Ein annan som treng å rydde tankane sine for tida er Iver. Han har sett Supernytt og fått med seg mykje om jordskjelvet på Haiti. Det gjer spesielt stort inntrykk å høyre om alle ungane som har mista foreldra sine.

Iver har difor starta sin eigen innsamlingsaksjon. "Iver samlar in" står det på glaset og alle som gir får teikningar. Sjølv har han gitt ei heil vekeløn og fått storesystra til å gjere det same. Summen er torsdag kveld kome opp i 148,50 kroner og vi reknar med at det vert litt meir før han avsluttar aksjonen.

Kanskje kjem Iver på døra hos deg, men viss ikkje oppmodar vi om å støtte ein av dei andre aksjonane som held på no.

PS Mamma er innsamlingsansvarleg for Iver sin aksjon og har lova at alle pengane skal sendast til Redd Barna.

Takk for strikkegleda, farmor!

2010-01-20T12:47:00.001+01:00

Ein sliten kropp gav seg i helga, og eg mista farmora mi. Vi var mange som mista ho, for etter farmor lever ein stor familie og mange veldig gode minner.

Det fyrste eg hugsar av farmor er nesten tretti år sidan. Vi reiste rett frå min fireårsdag til hennar femtiårsdag, og det var som om våre bursdagar hang saman. Ei stor feiring med mange damer eg ikkje kjente, supertanter eg kjente, kaker og meir kaker - og mange pakkar som eg fekk opne.

Ikkje lenge etter flytta vi, og eg fekk ei farmor i nabohuset. Alle skulle hatt ei farmor i nabohuset, men eg veit at eg har vore utruleg heldig og kjenner mi farmor spesielt godt. Ho var der jo alltid.

-

Det var mellom farmor sine kne eg strikka dei fyrste maskene. Det var gule masker. Ti masker fram og ti masker tilbake, mange gongar, vart til dukkegryteklutar. Farmor strikka ganske mange av dei maskene og hekla kant på, men eg kjempa så mykje med mine at det kjentest ut som om eg hadde strikka dei sjølv.

Hos farmor fekk eg prøve meg med fri tilgong på pinnar og garnrestar. Der fekk eg skryt og hjelp og gode råd. Når eg ikkje strikka eller las i strikkeoppskriftene, var det mi oppgåve å rydde i syskuffa. Syskuffa er eigentleg ein liten kommode med ei lita skuffe med bur til alle dei tinga du treng, og ei større skuffe der garnrestar og ting som ikkje vart ferdig låg. Det trong alltids litt rydding, og for meg var det heilt magisk med alle dei tinga vi brukar for å lage ting.

Kva brukar vi denne til?
Kvifor finst det sånne rare strikkepinnar med tråd mellom?
Kvifor er denne nåla så rar?
Korleis har dei laga denne knappen?
Kvifor er hekletråden så tynn?

Farmor var tålmodig, svarte, viste meg og lot meg prøve alt eg var nysgjerrig på. Eg slutta aldri å rydde i syskuffa. Det er berre nokre få år sidan sist.

-

Hos farmor vart eg ein strikkar. Vi var strikkarar begge to og strikkarar flest er interessert i spøtet til den andre. Sjølv då eg hadde flytta heimanfrå måtte eg alltid innom farmor med spøtet når eg var heime. Ho var nysgjerrig på kva eg heldt på med akkurat no, og eg ville sjå på det siste mønsteret ho hadde funne. Eg hadde med meg andre mønster og garntypar ho aldri hadde kjent på. Men teknikkane hadde ho alltid vore borti og eg fekk med meg korleis ting vart gjort før.

Også strikka vi og prata om det meste. Helst lenge!

Dei siste åra slapp ho meg òg inn i sorga over at fingrane ikkje kunne brukast til strikking meir. Vi prøvde ulike pinnar og garn i mange variantar, og noko gjekk betre enn anna. Ho gav seg ikkje utan kamp (ikkje den dama, nei), men tilslutt la ho pinnane ned og sa ifrå: Magni, no må du berre ta med deg oppskriftene. Eg kjem ikkje til å strikke meir. Det vart for brutalt å ta med seg eit heilt stikkeliv på ein gong, så det meste står att i eit altfor tomt hus.

Eg saknar farmora mi og ho var mykje meir enn ei strikkefarmor, men for meg er den delen viktig. For kvar maske eg strikkar vil ho alltid vere litt med.

Denne veka treng eg å strikke litt ekstra.

-

PS Sjalet på bilete er noko av det siste farmor strikka før pinnane måtte leggast vekk. Eg er så heldig at det bur her hos meg.

Biletet på pungen er eit ungdomsbilete av ho og farfar.

PPS Dersom det er andre som saknar bestemødrene sine kan de ta nokre minutt og lese Aina Basso sin laurdagstekst i Sunnmørsposten.

Vindmølle-kolleksjonen held fram

2010-01-16T18:46:00.000+01:00

Vindmølleinteressa har ikkje gitt seg, men denne gongen er ei av møllene frå ektemann-genseren, resirkulert og plassert på ein gamal veskemodell.

Mottakaren skal ut på tur i vindmølleteneste om ikkje så lenge, så då tenkte eg det passa godt med ny veske. Denne modellen er perfekt som ekstrautstyr på tur. Kan krøllast sammen og plukkast fram når du treng ei ekstra veske (kven gjer ikkje det?).

Det skulle forresten ikkje forundre med om det dukkar opp eit vindmølleinnlegg i morgon òg. Ha ein strålande laurdagskveld.